Түркияда жер титирөөдөн жабыркаган шаар толугу менен бузулуп, кайра курулат
Түркиядагы жер титирөөдөн олуттуу жабыркаган Нурдагы шаарын толугу менен бузуу чечими кабыл алынган. Бул туурасында губернатордун милдетин аткаруучу Осман Билгин айтты деп жазышат чет элдик басылмалар.
Куткаруу иштери аяктагандан кийин бийлик шаарды толугу менен калыбына келтирүүнү көздөп жатат.
"Биз чоң кырсыкты баштан кечирдик. Шаар куруу министри менен биргеликте чечим кабыл алдык: урандылардын баарын тазалап жатабыз, шаар толугу менен талкаланды. Бир эле үйдүн урандысынын астынан 150 адамдын сөөгүн таптык. Шаар кайра курулат", - деген Билгин.
Осман Билгиндин айтымында, Нурдагыдагы издөө-куткаруу иштери учурда акыркы сегиз үйдүн тегерегинде уланууда.
Нурдагы - Газиантеп облусундагы шаар жана район. Акыркы маалыматтар боюнча, кырсыкка чейин шаарда дээрлик 17 миң адам жашаган.
