Камбар-Ата-1 ГЭСин франциялык EDF Energy компаниясы курушу мүмкүн
Президенттин жана министрлер кабинетинин чечимдерин даярдоо башкармалыгынын башчысы Айбек Жунушалиев Улуу Британияга болгон жумушчу сапарынын алкагында Камбар-Ата-1 ГЭСин куруунун регионалдык долбоору боюнча кызматташуу мүмкүнчүлүгү боюнча Франциянын энергетикалык компаниясынын өкүлдөрү менен жолугушту.
Министрлер кабинетинин басма сөз кызматы билдиргендей, сүйлөшүүлөр Президент Садыр Жапаровдун 2022-жылдын ноябрында Бишкекте өткөн EDF Energy компаниясынын башчысы Беатрис Буффон менен жолугушуусунун жыйынтыгын ишке ашыруу алкагында өттү.
Тараптар аталган долбоорду ишке ашырууга компаниянын өзү, ошондой эле башка потенциалдуу инвесторлор жана эл аралык финансылык институттар тарабынан кызматташуунун жана инвестицияларды тартуунун мүмкүн болгон варианттарын талкуулашты.
Долбоорду ишке ашыруунун финансылык аспектилерин жана кызматташуу шарттарын мындан ары талкуулоо, ошондой эле Бишкекте бир катар кошумча консультацияларды өткөрүү боюнча макулдашылды.
Маалымдама: Франциянын Мамлекеттик компаниясы суммалык кубаттуулугу 20,1 миң МВт гидроэлектростанцияларга ээ. ГЭСтерди курууда жана башкарууда эл аралык тажрыйбасы бар. Компания Бельгияда, АКШда, Польшада, Италияда, Кытайда, Вьетнамда жана дүйнөнүн башка өлкөлөрүндө бар. Ошондой эле Улуу Британия боюнча электр энергиясын жана жаратылыш газын өндүрүү жана сатуу иштерин алып барат.
