Жогорку Кеңеш Жаныбек Абировдун маселесине байланыштуу комиссия түздү. Курамы
Жогорку Кеңештин депутаттары 15-мартта Башкы прокурордун сунушу менен Жаныбек Абировду кол тийбестиктен ажыратып, кылмыш жоопкерчилигине тартуу боюнча комиссия түзүштү.
Конституциялык мыйзамдар боюнча комитеттин төрайымы Чолпон Султанбекова белгилегендей, комитет мүчөлөрү көпчүлүк добуш менен комиссия түзүү чечимине келишкен.
Ошол эле учурда анын айтымында, вице-спикер Нурбек Сыдыгалиев комиссия түзбөөнү сунуштаган.
Парламенттик добуш берүүнүн жыйынтыгында комиссиянын курамы төмөнкүчө бекиди:
- Замирбек Мамасадыков ("Ыйман нуру");
- Дастан Бекешев (бир мандаттуу депутаттардын атынан);
- Айгүл Айдарова ("Бүтүн Кыргызстан");
- Бахридин Шабазов ("Ишеним");
- Медербек Саккараев ("Ата-Журт Кыргызстан");
- Жусупбек Коргонбай уулу ("Мекенчил" депутаттык тобу);
- Фархад Алимжанов ("Альянс");
- Мурадил Сыдыков ("Ынтымак");
- Бактыбек Чойбеков ("Элдик" депутаттык тобу).
Эске салсак, 11-март күнү кечинде Абиров Жеке күзөт кызматынын кызматкерин сабап салган.
Жабырлануучу жабык баш мээ жаракаты менен Улуттук госпиталга жаткырылган. Бул окуяга президент Садыр Жапаров реакция жасап, 13-мартта окуяга тиешеси бар эки шектүү милиция тарабынан кармалган.
Абиров социалдык түйүндөр аркылуу кечирим сурап, жоопкерчиликти тартууга даяр экенин билдирген.
