Активист Адилет Балтабай абактан бошотулду
Жогорку Сот Активист Адилет Балтабайды абактан бошотту. Бул тууралуу Kaktus.media сайтына адвокат Эркин Маданбеков билдирди.
Анын айтымында, 19-апрелде Жогорку Соттун коллегиясы Мыктыбек Адилет Алиге карата Бишкек шаардык сотунун 5 жылга эркинен ажыратуу тууралуу өкүмүн жокко чыгарып, Биринчи Май райондук сотунун өкүмүн күчүндө калтырды. Бишкек шаарынын райондук соту пробация көзөмөлү менен үч жылга эркинен ажыраткан.
Жогорку Соттун чечими бул жарыядан кийин дароо күчүнө кирип, Адилет Балтабай №27 колониядан бошотулду.
Эске салсак, өткөн жылдын 11-ноябрында Бишкектин Биринчи Май райондук соту Адилет Балтабайды "Бийлик өкүлдөрүнүн мыйзамдуу талаптарына активдүү баш ийбөөгө жана массалык баш аламандыкка, ошондой эле күч колдонууга чакыруу" боюнча кылмыш жасаган деп айыптаган.
Райондук соттун чечими менен Балтабай күнөөлүү деп табылып, беш жылга эркинен ажыратылган. Кылмыш-жаза кодексинин 82-беренесинин негизинде ага үч жылдык мөөнөткө пробациялык көзөмөл дайындалган. Активист сот залында камактан бошотулган.
Бирок 12-январда Бишкек шаардык соту активисттин өкүмүн өзгөртүп, аны камакта калтырган.
Балтабай кумарканаларды мыйзамдаштырууга, контролдук кассалык машиналарды милдеттүү түрдө орнотууга каршы митингдерине катышкан. Ал 2022-жылдын июнь айында камакка алынган.
