Равшан Жээнбеков президенттен жакындарына болгон куугунтукту токтотууну өтүндү
Саясатчы Равшан Жээнбеков президент Садыр Жапаровго кайрылып, анын жакындарын куугунтуктоону токтотууну өтүндү. Каттын сүрөтүн Archa.media жарыялады.
"Үч жылдан бери менин үй-бүлө мүчөлөрүмдү куугунтуктоо, камоо уланууда. Баары камалышты. Саясий оппонентиңизди куугунтуктоо бир, ал эми анын жакындарын кугунтуктоо кадыр-барк алып бербейт. Саясий маданиятка туура келбейт. Мындай көрүнүш Тажикстан менен Түркмөнстанда жок. Жакындарымды, үй-бүлө мүчөлөрүмдү камоо, куугунтуктоо токтотулсун!", - деди ал.
25-майда УКМКнын кызматкерлери Равшан Жээнбековдун жубайы Салкынай Алимбаеваны кармашкан. Маалыматка ылайык, ал Бишкектеги жерди мыйзамсыз менчиктеп алган деп шектелүүдө.
26-майда Бишкектин Биринчи Май райондук соту Салкынай Алимбаеваны эки айга камакка алуу чечимин чыгарды. Ал 24-июлга чейин УКМКнын СИЗОсунда болот.
Эске салсак, Равшан Жээнбеков өзү учурда Кемпир-Абад окуясы боюнча Бишкектеги СИЗО-1де. Саясатчы Ленин районундагы парламенттик шайлоого да катышууда.
