Акыйкатчы институту Ленин районундагы шайлоодо мыйзам бузууларды аныктады
Бүгүн, 28-майда Кыргыз Республикасынын Акыйкатчы институтунун кызматкерлери Ленин районунун №26 бир мандаттуу шайлоо округу боюнча Кыргыз Республикасынын Жогорку Кеңешинин депутатын шайлоого байкоо жүргүзүүдө. Бул тууралуу аталган башкармалыктан билдиришти.
Кызматкерлер институттун кызматкерлери тарабынан иштелип чыккан атайын анкета аркылуу шайлоо тилкелеринде шайлоонун жүрүшүнө көз салып турушат. Мониторинг жүргүзүүдө кызматкерлер ден соолугунун мүмкүнчүлүгү чектелген жарандардын шайлоого катышуу укуктарын коргоого өзгөчө көңүл бурушат.
Барган топ 11 шайлоо участкасында мониторинг жүргүзүп, мыйзам бузуулар катталып, алар жеринде жоюлган.
№1046 шайлоо участогунда байкоочулардын бири шайлоочунун паспорттук маалыматтарын сүрөткө тартып алган.
Аталган институттун кызматкерлери бул мыйзам бузууну каттап, БШКнын мүчөлөрүн жарандардын жашыруун добуш берүү укугун сактоого чакырышты.
Комиссиянын төрагасы бул шайлоочуга шайлоо жөнүндөгү мыйзамдарды бузууга жол берилбестигин эскертти.
"Акыйкатчы Жамиля Жаманбаева шайлоо учурунда жарандардын укуктарынын камсыздалышын көзөмөлгө алып, бардык одоно мыйзам бузуулар боюнча аларды жеринде жоюу боюнча тиешелүү мамлекеттик органдардын өкүлдөрү тарабынан институттун кызматкерлерине тиешелүү тапшырмалар берилет", - деп айтышты институттан.
Мониторингдин жыйынтыгы боюнча зарыл болгон учурда компетенттүү органдарга жана эл аралык уюмдарга тиешелүү сунуштар берилет.
БШКнын маалыматы боюнча, № 26 Ленин бир мандаттуу шайлоо округу боюнча Кыргыз Республикасынын Жогорку Кеңешинин депутатын мөөнөтүнөн мурда шайлоону даярдоого жана өткөрүүгө бир округдук шайлоо комиссиясы жана 51 участкалык шайлоо комиссиясы катышууда.
Эске салсак, №26 Ленин бир мандаттуу шайлоо округу боюнча Жогорку Кеңештин депутаты Жаныбек Абировдун ыйгарым укуктары мөөнөтүнөн мурда токтотулгандыгына байланыштуу Садыр Жапаров мөөнөтүнөн мурда шайлоону 2023-жылдын 28-майында өткөрүү жөнүндө жарлыкка кол койгон.
Борбордук шайлоо комиссиясы шайлоого даярдык көрүү боюнча иш-чаралардын календардык планын бекитип, жалпы 29 талапкер депутаттык мандат үчүн ат салышты.
