Мектеп директорлору жана орун басарларынын маянасы сентябрдан тарта көбөйөт
1-сентябрдан тартып мектеп директорлорунун жана директорлордун орун басарларынын айлыгы 50%га жогорулайт. Бул туурасында Билим берүү жана илим министрлигинин маалыматында айтылат.
Министрлер кабинетинин 2023-жылдын 14-августунда "Мугалимдердин жана мугалимдердин айрым категорияларынын эмгек акысын төлөө шарттары жөнүндө" токтомуна өзгөртүүлөр киргизилди. Анда билим берүү системасынын кызматкерлеринин 2022-жылдын 30-мартындагы №181 токтомуна ылайык, жалпы билим берүү уюмдарынын, атайын мектептердин, бардык типтеги жана аталыштагы мектеп-интернаттарынын директорлорунун жана директорлорунун орун басарларынын кызматтык маяналары 50%га жогорулатылды.
2023-жылдын 1-сентябрынан билим берүү уюмдарынын жетекчилеринин орточо эмгек акысы төмөндөгүдөй болот:
| Окуучунун саны | Директор | Директордун окуу-тарбия иштери боюнча орун басарлары |
|---|---|---|
| 100гө чейин | 24 000 | 21 000 |
| 100дөн 600гө чейин | 27 000 | 24 000 |
| 600дөн 1200гө чейин | 30 000 | 27 000 |
| 1200дөн 1800гө чейин | 33 000 | 30 000 |
| 1800дөн өйдө | 36 000 | 33 000 |
| Орточо эмгек акысы | 30 000 | 27 000 |
Башкы беттеги сүрөт иллюстрациялык: Табылды Кадырбеков.
