Экстремисттик уюмдун айрым мүчөлөрү камакка алынып, айрымдары агымдан баш тартты
УКМК тарабынан Баткен жана Кызыл-Кыя шаарында, Баткен жана Кадамжай райондорунда "Йакын-Инкар" диний-экстремисттик кыймылынын мүчөлөрүнүн үйүндө тинтүү иштери жүргүзүлдү. Анын алкагында 9 адам кармалды деп билдиришти коопсуздук комитеттен.
Кадамжай райондук сотунун чечими менен И.З.А. жана анын жакын өнөктөшү И.И.К. күнөөлүү деп табылып, өкүм чыгарылды. Ал эми "Йакын-Инкар" диний-экстремисттик кыймылынын калган мүчөлөрүнө карата кылмыш иштери өзүнчө өндүрүшкө бөлүнүп, учурда тиешелүү ыкчам иликтөө иш-чаралары жүргүзүлүүдө.
Мындан тышкары Баткен облусу боюнча "Йакын-Инкар" диний-экстремисттик кыймылынын мүчөлөрүнүн активдүүлүгүн азайтуу максатында (Баткен, Кызыл-Кыя шаарларында, Баткен жана Кадамжай райондорунда) аталган кыймылдын 12 мүчөсүнө УКМК тарабынан расмий эскертүүлөр берилип, жыйынтыгында алар тыюу салынган уюмга мүчө болуудан ыктыярдуу түрдө баш тартышты.
УКМК ар кандай радикалдык-экстремисттик уюмдардын жактоочуларынын кылмыштуу аракеттерин аныктоо жана бөгөт коюу, ошондой эле алардын катарына жаңы өкүлдөрдүн тартылышын алдын алуу боюнча профилактикалык иш-чараларды жүргүзүүнү улантууда.
