Ташиев кырдаалдын курчушуна байланыштуу Тажикстан менен чектеш чек арага жөнөп кетти
Кыргыз-тажик мамлекеттик чек арасын делимитациялоо жана демаркациялоо боюнча делегациянын башчысы болуп саналган УКМКнын башчысы Камчыбек Ташиев Тажикстан менен чек арага жөнөп кетти. Бул тууралуу министрлер кабинетинин маалыматтык камсыздоо бөлүмү билдирди.
Маалыматка ылайык, Ташиев министрлер кабинетинин чек ара маселелери боюнча атайын өкүлү Назирбек Бөрүбаев жана Мамлекеттик жер ресурстары агенттигинин директору Абдулат Мырзаев менен бирге республиканын түштүгүнө жөнөп кетти.
"Тажикстан Республикасынын аскер кызматкерлери, делимитация жана демаркация процесси аяктаганга чейин кыргыз-тажик мамлекеттик чек арасынын тактала элек тилкелеринде кандайдыр бир жумуштарды жүргүзүүгө тыюу салуу боюнча макулдашууларга карабастан, 2021-жылдын 4-июнунда эртең мененки саат үчтө Кыргыз Республикасынын аймагына 1000 метрге чейин кирип келип, Ош облусунун Чоң-Алай районунун Унжу-Булак мамлекеттик чек арасынын сүрөттөлө элек бөлүгүнө контейнер орнотту ", - деп айтылат маалыматта.
Тажик тарап, буга чейин жетишилген келишимдерди бузуп, кыргыз-тажик мамлекеттик чек арасындагы кырдаалды курчутту, бул коңшулук жана достук мамилелерге туура келбейт.
Буга байланыштуу УКМКнын башчысы учурдагы кырдаалды жөнгө салуу үчүн көрсөтүлгөн аймакка жөнөп кетти деп айтылат маалыматта.
