Садыр Жапаров: Парламенттик шайлоо май айынын соңунда өтөт
10-январда, Кыргызстанда президенттик шайлоо жана референдум өттү. Боршайком шайлоонун алдын ала натыйжаларын жыйынтыктап жатат. Электрондук эсептөөнүн натыйжасы боюнча кечки саат 23:00го карата Садыр Жапаров үчүн 79,15% адам добуштарын беришкен. Бул миллиондон ашык кыргызстандык. Ошол эле учурда, калктын президенттик шайлоого катышуусу өтө төмөн болуп, болгону 33,13%ы келген.
Садыр Жапаров 23:00дө өзүнүн штабында пресс-конференция берди.
"Парламенттик шайлоо май айынын соңунда өтөт. Ошондо, силер көрөсүңөр, шайлоо административдик ресурс колдонбой, сатып алууларсыз жана башка мыйзам бузууларсыз өтөт. Мындан ары бардык шайлоолор ачык-айкын өтөт. Мен мындан мурун айтып келгем, блокчейн ситемасын киргизебиз, деп. Келечекте ал бардык урналарга орнотулат, ошондо бардык жарандар кайсы жерде жүрбөсүн, шайлоого катыша алышат", - деди ал.
Ошондой эле Жапаров БШК шайлоонун жыйынтыгын бурмалабайт, деп кошумчалады.
"Элдин аң-сезиминде, БШК шайлоонун жыйынтыктарын бурмалайт, деген түшүнүк калыптанып калган. Мен да ошондой пикирде болчумун. Бирок бийликке келгенде, бардык серверлерди текшерип, БШКдагы көзөмөлдү көрүп, андай кылуу мүмкүн эместигине көзүм жетти", - деди Жапаров.
