Кимдин айлыгы канчага көтөрүлдү? Садыр Жапаровдун жообу
"Эң көп каржылоону Билим берүү жана илим министрлиги алды – быйылкы жылга 16 миллиард сомдон ашык каражат бөлүндү", - деди президент Садыр Жапаров социалдык кызматкерлердин республикалык кеңешмесинде сүйлөп жатып.
Анын айтымында, бардык категориялар боюнча өсүш кеминде 50% түздү.
"Биз бул жерде эмгек акы системасын калыбына келтирдик, категорияларды киргиздик. Мектеп мугалимдеринин орточо айлыгы 80% өстү дегенибиз менен чындыгында кээбиринин айлыгы үч эседен ашык көбөйгөн.
Мисалы, Лейлек районундагы башталгыч класстын мугалимин алалы, мугалимдик окуу жайын бүтүргөн, анын тажрыйбасы жок болсо да - эгерде мурда ага 8846 сом чегерилген болсо, колуна 7200 сом алган. Ал эми 1-апрелден тарта 23933 сом чегерилет, ал эми колуна 21800 сом ала баштайт. Көрүнүп тургандай, айлык үч эсе көбөйдү", - деди ал.
Дагы бир мисал: педагогикалык стажы жок, бакалавр даражасы бар Ысык-Ата мектебинин математика мугалими 1-апрелге чейин 10 миң 450 сом алган (12 миң 907 сом), эми ал 25 миң 300 сом (31 миң 333 сом) ала баштайт.
"Биз ушул пунктка көңүл буруубуз керек. Мугалимдердин айлык акысын мындан ары да аябайбыз. Мүмкүнчүлүк болгондо дагы айлыктарды көтөрөбүз.
Мектепке чейинки билим берүү мекемелеринин тарбиячыларынын айлыгы да 80%га өстү", - деди ал.
Маданият кызматкерлеринин айлыгы апрель айынан бери 100% жогорулаганын президент социалдык кызматкерлердин республикалык кеңешмесинде сүйлөп жатып билдирди.
Анын айтымында, жарлыкка ылайык, айлык акылар 100%га көтөрүлгөн.
Аламүдүн райондук борбордук китепканасынын китепканачысынын айлыгы мурда 10 миң 875 сом болсо, 1-апрелден тарта 21 миң 845 сомго жетти, же айлыгы эки эсеге өстү. Мамлекеттик Нарын облустук этнографиялык музейинде алдыңкы илимий кызматкер 17 миң 550 сом алса, эми 33 миң 222 сом алат.
Бийик тоолуу райондордун айлыгы менен кошо жөлөк пул толугу менен сакталып калган, деди ал.
"Бабур атындагы Ош академиялык театрынын актеру мурда 17 миң 700 сом алса, азыр 28 миң 239 сом алат. Баялинов атындагы республикалык китепкананын алдыңкы китепканачысы 9 миң сом алса, апрель айынан баштап 20 миң 444 сом алам. Эмгек жана социалдык коргоо министрлигинин кызматкерлери үчүн айлык акыны орто эсеп менен 2 эсеге көтөрдүк",- деди Садыр Жапаров.
Булак: Аkipress маалымат порталы
