Министр өлкөдө адам өлтүрүү, зордуктоо фактыларынын саны кыскарганын айтты
Ички иштер министри Улан Ниязбеков бүгүн, 18-июлда 1-жарым жылдыктагы отчёттук жумалыгынын алкагында жалпыга маалымдоо каражаттарынын өкүлдөрү, активисттер жана блогерлер менен жолугушту.
Анда министр өлкөдө жалпы кылмыштуулук 47 пайызга азайганын белгиледи.
Өткөн жылдын 6 айында 43 миң 159, 2022-жылдын ушул мезгилинде 22 миң 634 кылмыш катталып, 2021-жылга салыштырмалуу кылмыштардын саны 20 миң 525ке азайган.
Ачылган кылмыштар 2421ге же 19 пайызга көп. 2021-жылы 12 миң 428 кылмыштын бети ачылса, 2022-жылы 14 миң 849 кылмыш ачылган. 9891 кылмыш иши сотко жөнөтүлгөн, бул 423 кылмыш ишине же 4,5 пайызга көп (2021-жылы 9 миң 468 кылмыш иши сотко жөнөтүлгөн).
Министр оор жана өзгөчө оор кылмыштардын көрсөткүчтөрү 30 пайызга, адам өлтүрүү 6 пайызга, зордуктоо 45 пайызга, опузалоо 63 пайызга, алдамчылык 25 пайызга, унаа уурдоо 26 пайызга, уурулук 39 пайызга азайган деди.
