Журналист Семетей Талас уулунун кармалышы боюнча ИИМ билдирүү жасады
Журналист Семетей Талас уулу бир күн мурда милиция кызматкерлери тарабынан кармалып, 48 саатка камакка алынганы белгилүү болгон. Бүгүн, 2-ноябрда Ички иштер министрлиги журналисттин эмнеге кармалганы боюнча расмий билдирүү жасады.
Facebооk социалдык тармагынын Семетей Талас уулу аттуу колдонуучусу экстремисттик мазмундагы билдирүү калтырган дешет министрликтен.
Анын социалдык тармактагы посту 332-берененин 1-бөлүгү (Экстремисттик материалдарды даярдоо жана таратуу) менен каттоого алынып, тиешелүү экспертиза дайындалган. Экспертизанын корутундусу постто Кыргызстанда тыюу салынган "Хизб-ут-Тахрир" диний-экстремисттик уюмга таандык болгон маалымат камтылганын көрсөттү.
8-октябрда кылмыш иши ИИМдин Тергөө кызматына өткөрүлгөн. 1-ноябрда Семетей Талас уулу тергөө кызматына жеткирилип, Бишкек ШИИББдин убактылуу кармоочу жайына киргизилди. Учурда тергөө амалдары улантылууда дешти ИИМден.
