Сөөгү арыктан табылган. Россиядан чогуу келген шеригин өлтүргөнгө шектүүлөр кармалды
Россиянын жаранын өлтүрүүгө шектелип, издөөдө жүргөн жарандар Бишкектен кармалды. Бул туурасында ИИМдин басма сөз кызматынан кабарлайт.
Белгилүү болгондой, 20-июнда Жалал-Абад облусунун Токтогул районунда арыктан киши колдуу каза болгон жарандын сөөгү табылган.
Бул факты 122-берене (адам өлтүрүү) менен каттоого алынып, кылмыш иши козголгон.
Тергөө иштеринин жүрүшүндө каза болгон адам 44 жаштагы Д.К. экени аныкталган. Алдын ала маалыматтар боюнча, 2022-жылдын июнь айында Д.К. өзүнүн унаасы менен Ж.Т. жана А.М. менен Россиядан Кыргыз Республикасына келген. Андан кийин Россиянын жараны өлтүрүлүп, унаасы уурдалган. Ыкчам кызматкерлер унааны табышкан.
Ал эми 4-декабрда өзгөчө оор кылмыш жасагандыгы үчүн издөөгө алынып, Бишкек шаарында жашырынып жүргөн 32 жаштагы Ж.Т. жана 24 жаштагы А.М. кармалып, Токтогул РИИБдин убактылуу кармоочу жайына киргизилди.
